Lakshminarayanappa

ಲಕ್ಷ್ಮಿ ನಾರಾಯಣಪ್ಪ, ಯಶಸ್ವಿ ಖರ್ಜೂರ ಕೃಷಿಕ. ಚಿಕ್ಕಬಳ್ಳಾಪುರ ಜಿಲ್ಲೆಯ ಗುಡಿಬಂಡೆ ತಾಲ್ಲೂಕಿನ ಹಂಪಸಂದ್ರ ಗ್ರಾಮದ ಈ ಪ್ರಗತಿಪರ ರೈತ, ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಮೊದಲ ಬಾರಿಗೆ ಖರ್ಜೂರ ಬೆಳೆದು ಯಶಸ್ಸು ಕಂಡವರು. ಮೊದಲಿಗೆ ತಮ್ಮ ಜಮೀನಿನಲ್ಲಿ ತರಕಾರಿ ಬೆಳೆಯುತ್ತಿದ್ದ ಇವರು, ಬೆಲೆ ಸಿಗದೆ, ಮಾವು ಮತ್ತು ಸಪೋಟ ಹಣ್ಣುಗಳ ತೋಟ ಮಾಡಿದ್ದರು. ಅದರಲ್ಲೂ ನಿರೀಕ್ಷಿತ ಲಾಭ ಸಿಗಲಿಲ್ಲ. ಈ ನಡುವೆ ಏನಾದರೂ ನೂತನ ಪ್ರಯೋಗ ಮಾಡಬೇಕೆಂದು ಯೋಚಿಸುತ್ತಿದ್ದಾಗ ಗಮನಕ್ಕೆ ಬಂದಿದ್ದೇ ಖರ್ಜೂರ ಕೃಷಿ. ಅಂದಹಾಗೆ, ಲಕ್ಷ್ಮಿ ನಾರಾಯಣಪ್ಪ ತಮ್ಮ 84 ಎಕರೆ ಜಮೀನಿನಲ್ಲಿ ಖರ್ಜೂರ ಗಿಡಗಳನ್ನು ಬೆಳೆದಿದ್ದಾರೆ. ಈಗಾಗಲೇ ಅವರ ತೋಟದಲ್ಲಿರುವ ಖರ್ಜೂರ ಗಿಡಗಳು ಫಲ ಕೊಡುವುದಕ್ಕೆ ಆರಂಭಿಸಿದೆ. ಆರಂಭದ ಬೆಳೆಗಳನ್ನು ದುಬೈ ಮತ್ತು ಕತರ್‌ಗೆ ರಫ್ತು ಮಾಡಿ ಕೈತುಂಬಾ ಆದಾಯವನ್ನೂ ಗಳಿಸಿದ್ದಾರೆ. ಖರ್ಜೂರ ಕೃಷಿ ಮಾಡುವ ಬಗ್ಗೆ ಮತ್ತು ಖರ್ಜೂರ ಹಣ್ಣುಗಳನ್ನು ಮಾರಾಟ ಮತ್ತು ಮಾರ್ಕೆಟಿಂಗ್‌ ಮಾಡುವ ಬಗ್ಗೆ ಇವರಿಗೆ ಅಪಾರ ಮಾಹಿತಿ ಇದೆ.