ಬೋಯರ್ ಮೇಕೆ ಸಾಕಾಣಿಕೆ ಕೋರ್ಸ್- ವರ್ಷಕ್ಕೆ 30 ಲಕ್ಷ ಗಳಿಸಿ

ಮೊಹಮ್ಮದ್ ಯಾಹಿಯ, ಪ್ರಗತಿ ಪರ ಕುರಿ- ಮೇಕೆ ಕೃಷಿಕ. ಹುಟ್ಟಿದ್ದು ಚಿತ್ರದುರ್ಗ ಜಿಲ್ಲೆಯ ಚಳ್ಳಕೆರೆಯಲ್ಲಿ. ಓದಿದ್ದು ಅಷ್ಟಕ್ಕಷ್ಟೇ ಆದರೆ ಬದುಕಲ್ಲಿ ಬೆಳೆದ ಪರಿ ಮಾತ್ರ ಎಲ್ಲರಿಗೂ ಮಾದರಿಯಾಗಬೇಕು. ಇಂದು ಕುರಿ- ಮೇಕೆ ಉದ್ಯಮದಲ್ಲೇ ಕೋಟಿ ದುಡಿಮೆ ಕಂಡ ಸಾಧಕ ಇವರು. ಅದರಲ್ಲೂ ಆಫ್ರಿಕಾದ ಬೋಯರ್ ಮೇಕೆ ಮತ್ತು ಡಾರ್ಪರ್ ಕುರಿ ಸಾಕಣೆಯಲ್ಲೇ ದೊಡ್ಡ ಹೆಸರು ಪಡೆದವರಿವರು. 14 ಎಕರೆ ಜಾಗದಲ್ಲಿ ಸೊಗಸಾದ ಮೇವು, ನೀರು, ಶೆಡ್ ವ್ಯವಸ್ಥೆ ಮಾಡಿ ಡಾರ್ಪರ್- ಬೋಯರ್​ ತಳಿಯ ಬ್ರೀಡಿಂಗ್ ಮಾಡುತ್ತಿದ್ದಾರೆ. ಹಾಗಂತ ಮೊಹಮ್ಮದ್ ಏಕಾಏಕಿ ಕೃಷಿಯಲ್ಲಿ ಗೆದ್ದು ಬಂದವರಲ್ಲ, ಮೂಲ ಕೃಷಿಕರು ಕೂಡ ಅಲ್ಲ. ತನ್ನದೇ ಶ್ರಮದಿಂದ ಇಂದು ಕೋಟಿ ಸಂಪಾದನೆ ಮಾಡುವಷ್ಟು ಎತ್ತರಕ್ಕೆ ಬೆಳೆದಿದ್ದಾರೆ. ಹೌದು, ಜೀವನೋಪಾಯಕ್ಕಾಗಿ ಮೊಹಮ್ಮದ್ ಈ ಮೊದಲು ಮಾಡದ ಕೆಲಸವಿಲ್ಲ. ಹೀಗಿರುವಾಗ ಅದೊಂದು ದಿನ ಇವರು ಮನೆಯಿಂದ ಹೆಂಡತಿಯೊಂದಿಗೆ ಅನಿವಾರ್ಯ ಕಾರಣಕ್ಕೆ ಹೊರಬರಬೇಕಾಯಿತು. ಬರೀ ಗೈಯಲ್ಲಿ ಮನೆಯಿಂದ ಹೊರಬಂದ ಮೊಹಮ್ಮದ್ ಕುಟುಂಬ ನಿರ್ವಹಣೆಗಾಗಿ ಕುರಿ- ಮೇಕೆ ಸಾಕಣೆ ಆರಂಭ ಮಾಡಿದರು. ಒಲಿದ ಕಸುಬು ಅತಿ ದುಬಾರಿ ಬೋಯರ್- ಡಾರ್ಪರ್ ಮತ್ತು ನಮ್ಮ ದೇಶದ ರಾಜ ತಳಿ ಬೀಟಲ್ ಕೃಷಿಯಲ್ಲಿ ನಾಡಿನಲ್ಲಿ ಗುರುತಿಸುವಂತೆ ಮಾಡಿದೆ. ಹೆಂಡತಿ - ಮಕ್ಕಳ ಹಸಿವಿನ ನಿವಾರಣೆಗಾಗಿ ಟೊಂಕಕಟ್ಟಿ ನಿಂತ ವ್ಯಕ್ತಿ ಇದೀಗ 14 ಎಕರೆ ಕೃಷಿಕರಾಗಿದ್ದಾರೆ.